Ilo Diblomaasi ayaa sheegay inay dowladaha Maraykanka iyo Masar isla gaareen Qorshe lagu furayo Macbarka Rafax ee isku xira Masar iyo Falastiin, si loo badbaadiyo nolosha muwaadiniin Mareykan ah.
Qaar ka mid ah Falastiiniyiinta haysta dhalashada Maraykanka ee ku xayiran magaalada Qasa ayaa waxay E-mailo ka heleen Waaxda Maareynta Xasaradaha Qunsulliyadaha ee hoos tagta Wasaaradda Arrimaha Dibedda Maraykanka (CACMS) oo lagu wargeliyey Furitaanka Macbarka Rafax iyo inay ka soo gudbi karaan Rayidka iyo Shisheeyaha ku go’doonsan magaalladda Qasa ee Cunaqabataynta iyo Colaaduhu ku socdaan.
Tiro u dhexeyso 500 ilaa 600 Muwaadiniin Maraykan oo badankooda asalkooda Falastiin yahay ayaa ku xayirnaa magaalladda Qasa ilaa sabtidii la soo dhaafay oo ay dagaalamayaasha Xarakada XAMAAS weerar ka geysteen gudaha Israel.
Magaaladda Qasa ayaa waxaa ku socda Duqeymo iyo Barakac Baahsan, waxaana dadka ku nool laga jaray Raashinka, Biyaha, Shidaalka, Korantada iyo adeega Internet-ka.
