Aamina Keyf Axmed, oo ah Agaasimaha Isku-duwaha Arrimaha Haweenka ee Xafiiska Ra’iisul Wasaaraha Xukuumadda Federaalka Soomaaliya, ayaa daah-furtay barnaamij cusub oo warbaahineed oo loo bixiyay IFTIIN DUMAR, kaas oo diiradda saaraya nolosha, codka, caqabadaha iyo fursadaha haweenka Soomaaliyeed.
Barnaamijkan oo podcast ah ayaa noqonaya madal joogto ah oo lagu dhageysto, laguna soo bandhigo sheekooyinka iyo arrimaha saameeya nolol maalmeedkooda haweenka Soomaaliyeed.
Aamina Keyf, oo ah curiyaha barnaamijka, ayaa sheegtay in fikradda IFTIIN DUMAR ay ka dhalatay baahida loo qabo meel si joogto ah looga hadlo arrimaha haweenka, iyadoo aan sheekadu ku koobnaan oo keliya dhibaatooyinka ay la kulmaan.
“IFTIIN DUMAR waa madal warbaahineed oo diiradda saaraysa nolosha, codka iyo doorka haweenka Soomaaliyeed,” ayay tiri Aamina Keyf.
Barnaamijku wuxuu taaban doonaa mowduucyo ay ka mid yihiin waxbarashada, caafimaadka, shaqada, ganacsiga, amniga, qoyska, iyo ka-qaybgalka hoggaaminta.
Aamina waxay sheegtay in ujeeddadu aysan ahayn in haweenka mar walba lagu sawiro dhinaca caqabadaha oo keliya.
“Waxaan rabnaa in haweeneyda loo arko qof leh awood, karti, rajo iyo fursad, iyadoo isla markaana la aqoonsanayo caqabadaha ay la kulanto,” ayay tiri.
Mid ka mid ah waxyaabaha IFTIIN DUMAR lagu saleeyay ayaa ah isku xirka waayo-aragnimada qofka, xogta iyo xal-raadin.
Aamina waxay sheegtay in sheekada haweeneyda ay muujin karto sida arrin bulsho uga muuqato nolosha dhabta ah, halka xogtu ay ka caawin karto bulshada inay fahanto baaxadda iyo saameynta arrintaas.
Sidaas darteed, barnaamijku wuxuu doonayaa in marka dhibaato la soo bandhigo aan lagu ekaan tebin oo keliya, balse la raadiyo sababta keentay, cidda ay saameyneyso iyo waxa laga qaban karo.
Waxaa sidoo kale la qorsheynayaa in barnaamijku dib ugu laabto arrimaha uu soo bandhigo, si loo ogaado waxa ka dambeeya doodda iyo haddii ay jiraan tallaabooyin ama isbeddello ka dhashay.
IFTIIN DUMAR wuxuu sidoo kale doonayaa in haweenka laftoodu ay qayb firfircoon ka noqdaan ajendaha barnaamijka.
Aamina waxay sheegtay in haweenku soo jeedin karaan mawduucyo, la wadaagi karaan waayo-aragnimadooda, isla markaana ay qayb ka noqon karaan sheekooyinka barnaamijka.
Barnaamijku sidoo kale ma doonayo inuu ku ekaado codadka haweenka oo keliya. Ragga, khubarada, aqoonyahannada, sharci-yaqaannada iyo dadka kale ee door ku leh xalinta arrimaha laga hadlayo ayaa lagu martiqaadi doonaa.
Aamina waxay tilmaantay in xogtu ay qayb muhiim ah ka noqon doonto barnaamijka, iyadoo ballanqaadday in marka tirooyin iyo xog la adeegsanayo la caddeyn doono halka ay ka yimaadeen iyo waxa ay dhab ahaan cabbirayaan.
Ujeeddadu, ayay sheegtay, ma aha in xogta loo adeegsado qurxinta doodda ama taageeridda aragti hore loo qaatay, balse in bulshada laga caawiyo fahamka xaaladda dhabta ah. Gaar ahaan arrimaha waxbarashada gabdhaha, caafimaadka hooyada, fursadaha dhaqaale iyo ka-qaybgalka bulshada kuwo saameynaya qoysaska iyo bulshada oo dhan.
Sidaas darteed, barnaamijku wuxuu doonayaa inuu arrimaha haweenka u soo bandhigo qayb ka mid ah doodda ballaaran ee ku saabsan horumarka Soomaaliya.
Aamina Keyf ayaa IFTIIN DUMAR ku soo koobtay hal fikrad: in la dhageysto codka haweenka Soomaaliyeed, la iftiimiyo xaqiiqadooda, lana raadiyo fursadaha iyo xalalka noloshooda wax ka beddeli kara.
