Ra’iisul Wasaaraha Xukuumadda Federaalka Soomaaliya, Hamza Abdi Barre iyo wafdi uu hoggaaminayo ayaa gaaray magaalada Beledweyne ee Xarunta Gobolka Hiiraan, isagoo markii hore kasoo ambabaxay magaalada Qabri Dahare ee dowlad degaanka Soomaalida
Ra’iisul Wasaare Xamse Barre ayaa waxaa Garoonka diyaaradaha Ugaas Khaliif kusoo dhaweeyay Madaxweyne ku-xigeenka Dowlad Gobolleedka Hirshabelle, Yusuf Axmed Xagar, Guddoomiyaha gobolka Hiiraan Cali Jeyte Cismaan, Masuuliyiin iyo dadweyne aad u fara badan.
Ra’iisul Wasaare Xamse Cabdi Barre ayaa ujeedada socdaalkiisu tahay xoojinta dagaalka lagu ciribtirayo Al-shabaab iyo sidii loo dardar gelin lahaa dagaalka ciidanka dowladda Soomaaliya iyo kuwa deegaanku ay kula jiraan Al-shabaab.
Baladweyne ayaa waxaa Ra’iisul Wasaaraha Xukuumadda uga sii horreeyay oo saakay gaaray Wasiirrada Arrimaha Gudaha Xukuumadda Axmed Macallin Fiqi, Gaashaandhigga Cabduqaadir Maxamed Nuur Jaamac, Haweenka, Xildhibaanno iyo masuuliyiin kale.
Waa Socdaalkii labaad ee Ra’iisul Wasaare Xamse ku yimaado magaalada Beledweyne tan iyo markii uu xilka qabtay, taasi oo muujineysa ahmiyadda iyo mudnaanta uu Ra’iisul Wasaaraha iyo xukuumaddiisu siineyso dagaalka ka dhanka ah Al-shabaab.
