Deegaanka Somaliland ayaa maanta u dareeray doorashada madaxtinnimada maamulkaasi, oo sanadkan xiiso gaar ah iyo saameyn ballaaran ku leh bulshada.
Waddooyinka magaalooyinka waa weyn sida Berbera, Boorama, Burco, iyo Gabiley ayaa lagu arkayaa dadweynaha oo safaf dhaadheer ugu jira sidii ay codkooda u dhiiban lahaayeen. Dadka reer Somaliland ayaa goor hore oo saakay ah u istaagay inay ka qeyb qaataan doorashada, iyagoo muujinaya xamaasadda iyo rajada laga qabo isbedelka siyaasadeed ee ka hirgala.
Seddex Xisbi oo waa weyn ayaa tartamaya, oo uu ugu horreeyo Kulmiye, oo uu u taagan yahay Madaxweyne Muuse Biixi Cabdi, waxaa sidoo kale la loolamaya laba xisbi oo kale oo siyaasad ahaan miisaan culus leh, kuwaas oo kala ah Xisbiga Waddani oo uu musharrax u yahay Cabdiraxmaan Cirro – oo ah musharraxa ugu cadcad mucaaradka – iyo Xisbiga Kaah.
Tartankan ayaa wadooyinka magaalada ka dhigay kuwa saxmad iyo firfircooni ku jirta, iyada oo ay dad badan sugayaan inay marag ka noqdaan natiijada doorashadan muhiimka ah.
Amniga goobaha doorashada ayaa si weyn loo adkeeyey iyadoo ciidamo gaar ah loo diyaariyey goobaha codbixinta si loo hubiyo nabadgelyada.
Mas’uuliyiinta saddexda xisbi ee tartamaya ayaa shacabka ugu baaqay inay si nabad ah codkooda u dhiibtaan, iyagoo carrabka ku adkeeyey muhiimadda ay nabaddu u leedahay hannaan doorasho oo lagu kalsoonaan karo.
Wasaaradda Arrimaha Gudaha, Federaalka iyo Dib u heshiisiinta Xukuumadda Federaalka Soomaaliya (XFS) ayaa horey u bogaadisay nidaamka doorashooyinka Somaliland, taasoo lagu tilmaamay tillaabo horumarineed oo ku dayasho mudan. Doorashadan ayaa la filayaa inay dhammaystirto hab-raacyadii loo dejiyey, iyada oo laga rajeynayo natiijo cad oo muujinaysa rabitaanka shacabka Somaliland.
