Wararka aan ka heleyno deegaanka Xananbuure ee Gobolka Galgaduud ee Galmudug ayaa waxaa ay sheegayaan in halkaas daqiiqado kahor dil loo geystay qof shacab ah oo kamid ahaa dadka deegaankaas.
Dad ayaa waxaa ay ku warrameen in rag hubeysan oo maleeshiyaad ah ay Nin ku toogteen afaafka hore ee Xarunta shirkada hormuud ee deegaanka Xananbuure, isagoo u geeriyooday xabbado dhowr ah oo lagu furay.
Marxuumka la dilay ayaa dad yaqaano ayaa waxaa ay magaciisa ku sheegeen Cabdixamiid Daahir Aadan oo kamid ahaa dadka deegaanka Xananbuure, waxaana ragga hubeysan ay ku qaadeen weerar gaadmo ah.
Dilka loo geystay Cabdixamiid Daahir ayaa la tilmaamay inuu la xariiro aanooyin qabiil oo horey u dhacay, isla markaana waxaa goobta si dhaqsi ah uga baxsaday maleeshiyaadii falkaas ka dambeeyay, kuwaasi oo kasoo jeeda Cadaado.
Marar badan oo horey ayaa waxaa deegaano ka tirsan Gobolada Galgaduud iyo Mudug uga dhacay dagaal beeleedyo iyo dilal salka ku haaya aanooyin qabiil, waxaana muddooyinkii ugu dambeeyay Galmudug ku soo laab-laabtay falalkaas oo inta badan dhaliya dagaal beeleedyo.
