Madaxweynaha oo shaaciyey inay doonayaan in Xal-siyaasadeed lagu dhameeyo Dagaalka Alshabaab.

Madaxweynaha ayaa waxa uu hadalkaasi ka sheegay Khudbad uu maanta ka jeediyey Shirka Ganacsiga Caalaamiga “The Global Business Forum” oo ka furmay magaallaadda Dubai ee dalka Imaaraadka Carabta, wuxuuna carrabka ku dhuftay inay Dowladiisa u hawlgalayso sidii xal loogu heli lahaa dagaalladda Alshabaab ee ku-dhawaad tobanka sanno socda.

“Hal arrin waa la hubaa, ma qorsheynayo inaan qori keliya ku dhamayno Dagaalka Alshabaab, waxaa mar kasta jirayso Dib-u-heshiisiin” ayuu yiri Madaxweynuhu, wuxuuna dhinaac kale  qiray inay mar hore natiijo ka gaareen La-xaajoodka Alshabaab

Waxa uu tilmaamay in tiro badan oo Saraakiil Dhexe oo ka tirsanaa Xarakadda Alshabaab la heshiiyeen Dowladda Federalka, kuwaasi oo dib ugu soo laabtay xaalladda caadiga.

Hadalka Niyad-wanaagga ee Madaxweynaha Dowladda Federalka ka dhawaajiyey ayaa waxa uu ku soo beegmay iyadoo ay Ciiddanka Dowladda iyo kuwa Hawlgalka AMISOM kala wareegeen Dagaalamayaasha Alshabaab qeybo ka mid ah Goballadda Koonfurta Soomaaliya.

Dhinaca kale, Dagaalamayaasha Alshabaab waxay Tan iyo sannadkii 2007-dii dagaal kula jiraan Ciiddanka Dowladda Federalka iyo Ciiddanka Hawlgalka AMISOM oo tiradooda ka badan tahay 22,000 oo Askari.

© Radio Dalsan