Madaxweynaha Uganda, Yoweeri Museveni waxa uu Kulan la qaatay Danjiraha Maraykanka iyo Madaxa Ergadda Yurub ee u jooga dalka Uganda, Ambasasdor Deborah Malac iyo Kristian Schmidt, waxayna ka wada hadleen Horumarka dhinaca Siyaasadda iyo Doorashooyinka Uganda iyo Qorshaha Dowladda Uganda ee Ciiddankeeda qeybta ka ah Hawlgalka AMISOM.
Xoghayaha Warbaahinta ee Madaxtooyadda Uganda, Linda Nabusayi ayaa u sheegtay Wargeyska The Monitor in Kulankaasi looga hadlay qoddobo muhiim, isla markaana ay saddexda Mas’uul isla qaateen qoddobadii ay ka hadleen.
Sarkaalka EU-da ugu qaabilsan Warbaajinta, Emmanuel Gyezaho ayaa sheegay inay Madaxweynaha Uganda kala hadleen xiriirka EU-da iyo Uganda iyo Arrimaha gobalka, gaar ahaan Hawlgalka Nabad-ilaalinta Somalia.
Madaxweynaha Uganda iyo Madaxa Ergadda Yurub ee u jooga dalka Uganda, Kristian Schmidt waxay si gaar ah uga hadleen doorka Ciiddanka Uganda ee Hawlgalka AMISOM iyo go’aankii Dowladda Uganda isbuucii hore ku shaacisay inay Dib-u-eegis ku samaynayaan Ciiddankooda ka jooga Somalia.
Madaxweyne Museveni waxa uu sheegay inaysan Uganda marnaba ciiddankeeda kala soo bixi doonin Somalia, balse ay dib u eegayaan Hawlaha Ciiddanka Uganda ee loo daad-gureeyey Somalia.
Kulanka Madaxweynaha Uganda la yeeshay Diplomaasiyiin ka socday Maraykanka iyo Midowga Europe ayaa ku soo beegmay, iyadoo la filayo inay Taliska Sare ee Hogaaminta Ciiddanka Uganda oo uu Madaxweyne Museveni madax ka yahay ay muddo labo isbuuc kadib soo saaraan Go’aankooda Rasmiga ee ku aadan Dib-u-eegista Istaraatijiyadda Ciiddankooda qeybta ka ah Hawlgalka AMISOM.
Dhinaca kale, Wargeyska The Monitor ma sheegin in Kulankaasi looga hadlay Tallaabadda ay EU-da ku jareen 20% Kaalmadda Dhaqaale ee ay siiyaan Hawlgalka AMISOM iyo Mushaar la’aanta dhowrka bilood ee haysata Ciiddanka Uganda ee qeybta ka ah Hawlgalka AMISOM.
©Radio Dalsan
