Madaxweynaha dowlad Federaalka Soomaaliya Xasan Sheekh Maxamuud oo ku sugan degmada Cadale ee Gobolka Shabeellaha Dhexe ee Maamulka Hirshabeelle ayaa kormeeray furimaha dagaalka ee ciidamada xoogga iyo macwiisleyda ee Gobolkaas.
Madaxweyne Xasan Sheekh ayaa dul-istaagay difaacyada ciidamada dowladda iyo kuwa macwiisleyda ay ugu jiraan degaano ka tirsan Shabeellaha Dhexe, wuxuuna sidoo kale Xasan u kuur-galay sida ay ciidamada ugu diyaargaroobeen dagaalka Al-shabaab.
Sidoo kale Madaxweynaha dowladda ayaa ciidamada ku boggaadiyay dardar-gelinta howlgalada ka dhanka ah Al-shabaab ee ka socda Gobolka, isla markaana ku dhiirageliyay ciidamada Xoogga dalka iyo ciidamada deegaanka dagaalka.
Madaxweynaha ayaa waxaa booqashadan ku wehelinayey Madaxweynaha dowlad-goboleedka Hir-shabeelle, Wasiirka Gaashaandhigga, Taliyaha ciidamada Xoogga dalka Soomaaliyeed, Xildhibaano, guddoomiyaha Maxkamadda sare ee ciidamada qalabka sida iyo Guddoomiyaha Maxkamadda darajada koowaad ee ciidamada qalabka sida.
Xasan Sheekh Maxamuud ayaa maalmo kahor booqday deegaanada Nuur-dugle iyo Masaajid Cali guduud oo ka mid ah deegaanadii ugu dambeeyey ee laga xoreeyey Al-Shabaab, isagoona halkaas kula kulmay Saraakiisha hoggaamineysa ciidamada.
