Ciidanka Xoogga Dalka Soomaaliyeed ayaa howlgallo culus ka billaabay Gobolka Bakool ee maamulka Koofur Galbeed, kuwaas oo lagu beegsanayo kooxaha Al-Shabaab.
Guutada 9-aad ee Qeybta 60-aad ee Ciidanka Xoogga ayaa saaka aroortii hore ku jarmaaday deegaano ku dhow magaalada Xuddur, halkaas oo ay ka fuliyeen howlgallo xooggan oo ka dhan ah Al-Shabaab.
Howlgalka ayaa ka dhacay degaannada Wargoloole, Hooyaley, ilaa Abagbeeday, oo ku yaalla qiyaastii 20 km dhinaca waqooyi ee magaalada Xuddur. Ciidanka Xoogga ayaa si toos ah uga hortagaya Al-Shabaab, iyaga oo isku dayaya inay sii xoojiyaan amniga gobolka Bakool.
Howlgalladu waxay weli socdaan, waxaana la xaqiijiyay in ciidamada ay horumar sameynayaan.
Si kastaba ha ahaatee, ilaa hadda wax faahfaahin dheeraad ah oo ku saabsan khasaaraha ka dhashay howlgalladaasi lagama helin. Ciidanka Xoogga ayaa sii wadi doona hawlgalka, iyadoo ujeedadu tahay in laga xoreeyo degaannadaasi Al-Shabaab, loona adkeeyo amniga guud ee gobolka.
