Faahfaahino dheeri ah ayaa kasoo baxaya dhacdo toogasho ah oo saaka ka dhacday magaalada Guriceel ee gobolka Galgaduud. wararka aan helnay ayaa xaqiijinaya in nin Itoobiyaan ah lagu dilay goob garaash ah oo gawaarida la dhigto, halka mid kale uu dhaawac halis ah soo gaaray.
Labadan qof ayaa la sheegay inay ka mid ahaayeen shaqaalaha ka shaqeeya garaashkaas, sida ay dadka degaanku sheegeen.
Sida la sheegay, nin ku lebisan dharka ciidanka ayaa si lama filaan ah u weeraray labada nin ee Itoobiyaanka ah, hase yeeshee lama oga sababta ka dambeysa falkaas.
Dhacdadan argagaxa leh ayaa si gaar ah uga dhacday Waaxda Istarliin, Xaafadda Wadajir ee degmada Guriceel.
Ciidamada ammaanka ayaa durbadiiba gaaray goobta ay toogashadu ka dhacday, iyagoo weli ku guda jira baaritaan ballaaran oo lagu ogaanayo sababta dhabta ah ee ninka weerarka geystay ku kalliftay falkaas dhimashada iyo dhaawaca keenay.
Baaritaannada socda ayaa la filayaa in ay iftiimiyaan xaaladda oo dhan iyo cidda ka dambeysa falka, isha ayaa lagu hayaa natiijada baaritaanka iyo tallaabooyinka ay qaadi doonaan laamaha ammaanka.
