Wararka ka imaanaya garoonka diyaaradaha magaalada Boosaaso ayaa sheegaya in saaka uu halkaasi ka degtay diyaarad rakaab ah oo ay leedahay shirkadda Daallo Airline. Diyaaraddan ayaa shalay ka baaqatay inay soo caga dhigato garoonka Boosaaso, balse warar lagu kalsoon yahay ayaa xaqiijinaya in saaka xilli hore ay si nabad ah ku timid garoonka.
Diyaaradda ayaa rakaab u qaaday magaalooyinka Muqdisho iyo Nairobi, taasoo muujinaysa in shaqada garoonka ay dib u soo noqotay si caadi ah. Xaaladdan ayaa soo ifbaxday xilli ay jireen warar sheegayay in garoonka Boosaaso uu xirmay kadib digniin amni oo kasoo baxday ciidamada PSF (Puntland Security Force), kuwaasoo uga digay gaadiidleyda inay ka fogaadaan waddooyinka ku dhow garoonka.
Si kastaba ha ahaatee, digniintii PSF waxaa xalay beenisay Wasaaradda Duulista Hawada iyo Garoomada Puntland, oo ku adkeysatay in garoonku si caadi ah u shaqeynayo, amnigiisuna uu yahay mid aad loo adkeeyay.
Mas’uuliyiinta wasaaradda ayaa ku baaqay in bulshada aan lagu marin habaabin warar aan sal lahayn oo ku saabsan amniga garoonka Boosaaso, taasoo ay sheegeen inay tahay mid la hubiyay oo sugnaan buuxda leh.
Arrintani waxay ka tarjumeysaa xaaladda siyaasadeed iyo midda amni ee Puntland, gaar ahaan Boosaaso, oo dhowaanahan ay soo baxayeen warar ku saabsan khilaafaadka ka dhex jira maamulka gobolka iyo awoodda ciidamada kala duwan, iyadoo PSF-na ay door muhiim ah ka ciyaarayaan sugidda amniga gobolka. Balse, maamulka Puntland ayaa doonaya inuu muujiyo in dhaqaalaha iyo isku socodka bulshada ay si caadi ah u shaqeynayaan, inkastoo ay jiraan digniino amni.
