Waxaa Maanta oo khamiis ah magaalada Muqdisho laga soo dejin doonaa Meydka Allaha u naxariistee Wasiirkii Haweenka iyo Xuquuqda Aadanaha Xukuumadda Soomaaliya, Marxuum Khadiija Maxamed Diiriye oo ku geeriyootay dalka Jabuuti.
Diyaarad gaar ah ayaa sida uu qorshahu yahay looga soo qaadayaa Meydka Khadiija Diiriye oo shalay ku geeriyootay isbitaal ku yaalla Jabuuti, kadib xaalad caafimaad oo degdeg ah ay la soo daristay, laguna sameeyay Qaliin.
Ra’iisul Wasaare Xamse Cabdi Barre iyo mas’uuliyiin kala duwan oo ka tirsan dowladda Federaalka Soomaaliya, kuna sugan Jabuuti oo ay uga qeyb galeen Shirkii Machadka Heritage ayaa iyaguna maanta soo gaaraya Muqdisho.
Qaban-qaabo ballaaran ayaa ka socota Garoonka diyaaradaha Aadan Cadde ee magaalada Muqdisho, waxaana ku sugan Guddiga qaban-qaabada Aaska Wasiirkii Haweenka ee uu magacaabay Ra’iisul Wasaaraha Xukuumadda Xamse Cabdi Barre.
Saacadaha soo socda ayaa allaha u naxariistee Marxuum Khadiija Maxamed Diiriye lagu aasi doonaa qabuuro ku yaalla magaalada caasimadda ah ee Muqdisho, waxaan Aaska ka qeyb galaya Madaxda ugu sarreeysa dalka, mas’uuliyiin kala duwan iyo kumanaan dadweyne ah.