Faah faahino ayaa laga helayaa kooxo hubeysan oo burcad Koonfur Afrikaan ah muwaadin soomaali ah ku dishay xaafad hoostagta degmada Gugulethu ee magaalada Cape Town ee dalkaas.
Allaha u naxariistee Muwaadinka la dilay ayaa waxaa lagu magacaabi jiray Ibrahim Afurow Nuur Xuseen, waxaana markii hore dhaawac kasoo gaaray rasaas ay burcada la beegsadeen, balse markii dambe u geeriyooday.
Dad kale oo Soomaali ah kana agdhawaa goobta uu falka ka dhacay ayaa halkaasi ka qaaday meydka marxuumka, waxaana sida la tilmaamay Ibraahim uu ka shaqeynayay dukaan ku yaalla xaafad hoostagta degmada Gugulethu ee magaalada Cape Town.
Burcada hubeysan ee falka geeystay ayaa isaga baxsaday goobta, Ciidamo Boolis oo gaaray dukaanka lagu weeraray Muwaadinka Soomaaliyeed ayaa sheegay in ay baarayan falka burcadnimo ee lagu dilay Muwaadinka Soomaaliyeed .
Si kastaba waxaa sii kordhaya dilalka iyo dhibaatooyinka kale ee loo geysanayo muwaadiniinta Soomaaliyeed ee ku nool dalka Koonfur Afrika , iyadoo aysan jirin cid iska xil-saartay sidii wax looga qaban lahaa dhibaatooyinka lagu haayo Muwaadiniinta.