Rag hubeysan oo maleeshiyo beeleed ah ayaa habeenimadii xalay aheyd meel ku dhow deegaanka Xaaji Cali ee Gobolka Shabeellaha Dhexe waxa ay ku dileen Macallin Dugsi Qur’aan iyo xertiisa, waxaana falkaasi kasoo baxaya faah faahino dheeraad ah.
Ragga ayaa la sheegay inay Macallinka iyo xerta la socotay oo xiiligaa ka yimid Subac Akhris ay wadada u galeen, isla markaana mar qura ay rasaas ooda uga qaadeen, iyagoona dhammaantood dadkaas oo gaarayay 5 ruux ay goobta ku naf-waayeen.
Guddoomiyaha degmada Cadale ee Gobolka Shabeellaha Dhexe oo la hadlay warbaahinta ayaa sheegay in falka foosha xun ay geysteen dabley hubeysan oo uu xusay inay haatan ku raadjoogan ciidanka Booliska Maamulka.
Wuxuu intaas kusii daray Guddoomiyaha Cadale in ay socdaan howlgalo lagu soo qabanayo dadkii ka danbeeyay dilka, isagoona sheegay in Macallinka iyo xertiisa ay u socdeen deegaanka Xaaji Cali ee hoostaga magaalo xeebeedka Cadale.
Falkan ayaa waxaa la sheegay inuu yahay mid salka ku haaya aano qabiil, Xaaladda ayaa haatan ah mid aad u kacsan, waxayna arrintan sii hurineysaa colaad beeleedka ka taagan aagga degmada Cadale ee gobolka Shabeelaha Dhexe.
