Wasiir ku-xigeenka Wasaaradda Kallumaysiga iyo Dhaqaalaha Buluugga ah Xukuumadda Federaalka Soomaaliya, Cali Ifiye Cali oo uu wehliye la-taliyaha Wasaaradda Xasan Xaaji Ibraahim ayaa Jasiiradda Comoros uga qeyb galay shir loogu hadlaayay dhaqaalaha buluugga iyo isbeddelka cimilada.
Shirkan oo ay ka soo qeyb galeen wadamada Xeebaha leh iyo jasiiradaha yar yar ee qaaradda Afrika ayaa loogu hadlay sidii looga faa’iidaysan lahaa khayraadka badda, ka hortaga Kallumaysiga sharci darrada ah iyo isbedelka cimilada.
Wasiir ku xigeenka Wasaaradda Kallumaysiga iyo Dhaqaalaha Buluugga ah Cali Ifiye Cali oo khudbad ka jeediyay shirka ayaa ka hadlay qorshaha Dowladda Soomaaliya ee ka faa’ideysiga dhaqaalaha Bulluugga ah iyo muhiimadda Afrika gaar ahaan Soomaaliya u leedahay horumarinta kalluumaysiga.
Bayaan wadajir ah oo laga soo saaray gaba gabada shirka ayaa loogu magac daray bayaankii Moroni oo ah Caasimadda Jasiradda Comoros.
Dhinaca kale Wasiir Cali Ifiye ayaa kulamo gaar gaar ah la yeeshay wasiirada shirka ka soo qeyb galay gaar ahaan wasiiradda ka socday dowladda Kenya, Jasiiradda Comoros iyo Jasiiradda Siishalis.