Madaxweyne ku xigeenka HirShabelle Yusuf Ahmed Hagar Dabageed ayaa ka jawaabay wararkii maalmihii ugu dambeyay la isla dhex-marayay ee ku aaddanaa in khilaaf xooggan uu u dhexeeyo isaga iyo Madaxweynaha maamulkaaasi Cali Guudlaawe Xuseen.
Yuusuf Dabageed ayaa beeniyey eedo loo soo jeediyey oo ku aadan inuu madaxtooyada dowlada Soomaaliya kala shaqeynaayo sidii dad gaar ah oo ay wadato loogu xiri lahaa kuraasta qaar.
Waxaa uu intaasi ku daray in uusan jirin wax khilaaf ah oo u dhexeeya labadooda, isagoo intaa ku daray in go’aan kasta uu leeyahay Madaxweynuhu.
Sidoo kale Madaxweyne ku xigeenka Maamulka Hirshabeelle ayaa sheegay in aysan jirin doonin kuraas gaar ah oo dad loo xiri doono, haatanna ay ka shaqeynayaan sidii doorasho daah furan ay kaga dhici laahyd Hirsahbelle.
Jawaabta Dabageed ayaa timid ayada oo Madaxweynihii hore ee HirShabelle Maxamed Cabdi Waare uu sheegey in madaxweynaha HirShabelle Cali Guudlaawe uu muujiyey niyad wanaag iyo in doorashada si furan loogu tartamo, balse ay jiraan xubno ka mid ah maamulka oo la shaqeynaya Villa Somalia.
Waxaana isi soo taraya wararka xasaasiga ah ee ku aaddan doorashada Golaha Shacabka ee maamulka Hirshabelle, waxaana Guddiga Doorashooyinka heer Federaal ay shaaciyeen in ay hakiyeen qabashada doorashada Seddex kursi oo kamid ah kuraasta golaha shacabka ee yaalla magaaalada Beledweyne ee xarunta Gobolka Hiiraan.
Waxaana amarkaasi uu ka dambeeyay kadib markii Guddiga maamulkaasi uu sheegay in berry uu qabanayo doorashada Kuraasta la hakiyay, balse  guddiga Doorashooyinka Hirshabelle ee SEIT weli wax jawaab ah kama baxin warka ka soo baxay guddiga Doorashooyinka heer Federaal.
