Doorashada Xubinnimada Golaha Amniga iyo Nabadda Midowga Afrika ayaa Maanta oo khamiis ah ka dhacday Magaalada Addis Ababa ee Caasimadda dalka Itoobiya, iyada doorashada ay tahay mid ay ka wada qeyb galeen dalalka ku jira Golaha Amniga.
Doorashada ayaa waxaa sanadkaan ku tartamay dowladdaha Soomaaliya iyo Jabuuti, isla markaana waxaa Xubinnimada Golaha Amniga iyo Nabadda Midowga Afrika ku guuleystay dalka Jabuuti.
Dowladda Jabuuti ayaa heshay codod dhan 19 Cod, halka Soomaaliya ay heshay 13 Cod, tani ayaa ka dhigan in Jabuuti ay xajisatay xubinnimadi Golahaas sanadka 2022-2025.
Kooxda Diblomaasiyiinta iyo Ergada Soomaaliya ee Midowga Afrika ee uu hoggaaminayay Wasiirka Arrimaha Dibadda Soomaaliya ee xilgaarsiinta ayaa sameeyay bilow wanaagsan iyo dadaalo xooggan oo ay taageero kaga raadinayeen dalalka Midowga Afrika intii uu socday Ololaha doorashada kursigan oo aad muhiim ugu ahaa Soomaaliya.
Wasiirka Arrimaha Dibadda Cabdisaciid Muuse Cali ayaa kulamo doceedyo Magaalada Addis Ababa ee Caasimadda Itoobiya kula qaatay Wasiirada Arrimaha dibadda dalalka Afrika ee ka qeyb galayay Shirka Golaha fulinta Midowga Afrika oo ka qabsoomay Magaaladaas.
