Doorashada kuraas kamid ah Golaha Shacabka Baarlamaanka Federaalka ee Gobolada Waqooyi ee Somaliland ayaa Maanta ka dhacday Xarunta Teendhada Afiysooni ee Magaalada Muqdisho, waxaana doorashada dhacday lagu doortay saddex kursi.
Doorashada kursiga HOP#244 ee Gobolada Waqooyi ayaa waxaa isku soo sharaxay laba Musharax oo kala ah Kaltuun Xayir Jaamac iyo, Siciid Maxamed Maxamuud, waxaana doorashada kusoo baxay Siciid Maxamed oo Cod gacan taag ah loogu coddeeyay.
Ifraax Maxamed Cawad ayaa ku guuleystay kursiga HOP#037 ee Golaha Shacabka, iyadoona loogu coddeeyay Cod gacan taag ah, kadib markii tartanka doorashada ka tanaasushay Caasha Cabdilaahi Warsame Diiriye oo la tartami laheyd Ifraax Maxamed.
Doorashada kursiga tirsigiisu yahay HOP#238 ayaa waxaa ku tartamay Musharaxiinta kala ah Ismaaciil Cabdiraxmaan Sheekh Bashiir iyo Cabdilaahi Cabdiqani Ibraahim, waxaana doorashada kusoo baxay Ismaaciil Cabdiraxmaan Sheekh.
Ismaaciil ayaa loogu coddeeyay Cod gacan taag ah, isagoona ku guuleystay kursiga Golaha Shacabka ee tirsigiisu yahay HOP#238 ee Gobolada Waqooyi ee Somaliland.
Guddiga maamulka Doorashada kuraasta Gobolada waqooyi Somaliland SEIT ayaa ku dhawaaqay dhammaan Natiijada saddexdii doorasho ee tartan la’aanta aheyd ee Maanta ka dhacday Teendhada Afiysooni ee Magaalada Muqdisho.
