Madaxweyne ku-xigeenka Maamulka Hirshabeelle Yuusuf Axmed Hagar Daba-gabeed ayaa ka Jawaabay hadalkii kasoo yeeray Wasiirka Arrimaha Gudaha Xukuumadda xilgaarsiinta iyo siyaasiyiin kasoo jeeda Gobolka Hiiraan ee uga hadlayeen Ciidanka Booliska Haramcad ee shalay la geeyay Magaalada Baladweyne.
Yuusuf Daba-geed oo shir Jaraa’id ku qabtay Xarunta Madaxtooyada ayaa waxaa uu sheegay in siyaasiyiinta hadlay ee uu ku jiray Wasiir Jeneraal Mukhtaar Xuseen Afrax ay yihiin kuwo kuraas raadis ah oo aysan u hadli karin Gobolka Hiiraan.
Wuxuu intaas kusii daray Madaxweyne ku-xigeenka Maamulka Hirshabeelle in Ciidanka Booliska Haramcad ee shalay la geeyay Magaalada Baladweyne aan halkaas loo geynin in lagu boobo doorashada Golaha Shacabka ee ka dhaceysa Magaaladaas.
Yuusuf Daba-geed ayaa tilmaamay in Ciidamada Haramcad ay ka qeyb noqon doonaan Ciidamada ammaanka Magaalada ee sugaya amniga guud ee Baladweyne, isla markaana uu Maamulka Hirshabeelle ka dalbaday dowladda Federaalka in Ciidankaas loo soo diro.
Diyaarad sidday ku dhawaad 100 Askari oo Haramcad ah ayaa ka degtay Garoonka diyaaradaha Ugaas Khaliif, waxaana Ciidamada la geeyay kasoo horjeeystay Wasiirka Arrimaha Gudaha Xukuumadda xilgaarsiinta iyo siyaasiyiin kasoo jeeda Gobolka Hiiraan.
Wasiir Mukhtaar Xuseen Afrax, Agaasimihii hore ee NISA Cabdullaahi Sanbaloolshe, Wasiirkii hore Waxbarashada Cabdullaahi Goodax Barre iyo siyaasiyiin kale ayaa sheegay in ujeedka Ciidanka loo geeyay Baladweyne ay tahay in lagu boobo doorashada Golaha Shacabka.
