Ra’iisul Wasaaraha Xukuumadda Federaalka ee xilgaarsiinta Maxamed Xuseen Rooble iyo wafdi uu hoggaaminayay ayaa goor dhow gaaray Magaalada Kismaayo ee Caasimadda KMG ka ah ee Maamulka Jubbaland.
Garoonka diyaaradaha Kismaayo ayaa waxaa Ra’iisul Wasaare Rooble iyo wafdigiisa kusoo dhaweeyay Madaxweynaha Jubbaland Axmed Madoobe, Mas’uuliyiin badan oo ka tirsan Maamulkaas iyo qeybaha kala duwan.
Ra’iisul Wasaaraha ayaa gudaha Garoonka salaan sharaf uga qaatay Cutubyo ka tirsan Ciidanka dowlad Goboleedka Jubbaland, isagoona ka mahadceliyay soo dhaweynta loo sameeyay, kadibna loo galbiyay dhinaca Madaxtooyada.
Ujeedka Ra’iisul Wasaaraha Xukuumadda xilgaarsiinta ee Kismaayo ayaa waxaa uu yahay sii xoojinta dadaalada doorashooyinka dalka ka dhacaya, gaar ahaan sidii xal looga gaari lahaa khilaafka ka jira Gobolka Gedo.
Rooble ayaa kulan la qaadan doona Madaxweyaha Jubbaland Axmed Maxamed Islaam Axmed Madoobe, isagoona kala hadli doona dardar-gelinta howlaha doorashooyinka, sidoo kalena waxaa uu la kulmi doonaa Rooble qeybaha kala duwan ee Bulshada.
Ammaanka Magaalada Kismaayo ee Xarunta Gobolka Jubbada Hoose ayaa Maanta siweyn loo sameeyay, waxaana socdaalkii ugu horreeyay ee Ra’iisul Wasaare Rooble ku tegay Jubbaland tan iyo markii loo magacaabay xilka.
