Midowga Musharaxiinta u taagan qabashada xilka Madaxtinimada dalka oo ay hoggaaminayaan Madaxweyneyaashii hore ee Soomaaliya ayaa xalay kulan gaar ah ku yeeshay Magaalada Muqdisho.
Kulanka oo uu shir guddoominayay Guddoomiyaha Midowga ahna Madaxweynihii hore ee dalka Sheekh Shariif Sh Axmed ayaa waxaa uu ahaa mid ay xubnaha Musharaxiinta isaga xog-wareysanayeen xaaladdihii ugu dambeeyay ee siyaasadda.
Sidoo kale inta uu socday kulanka ayaa waxaa looga hadlay Arrimaha doorashooyinka la filayo inay dhawaan ka dhacaan dalka, kadib markii Madaxda dowladda Federaalka iyo kuwa maamul Goboleedyada ay heshiis rasmi ah ka gaareen.
“Waxaan iska xog wareysannay marxaladihii ugu dambeeyey ee xaaladda Dalka iyo Doorashooyinka la filayo dhawaan inay bilaabmaan” ayuu yiri Sheekh Shariif oo qoraal kooban bartiisa Facebook soo dhigay.
Madaxweyneyaashii hore ee dalka Sheekh Shariif Sh Axmed, Xasan Sheekh Maxamuud, Ra’iisul Wasaarihii hore ee Xukuumadda Xasan Kheyre iyo xubno kale oo ka tirsan Midowga Musharaxiinta ayaa ka qeyb galay kulankaas.
Kulankaan ayaa waxaa uu kusoo aaday, iyada oo Midowga Musharaxiinta Madaxweynaha ay Xukuumadda xilgaarsiinta u gudbiyeen xubnaha Guddiga labada heer ee doorashooyinka ee cabashada laga keenay, isla markaana shalay Xukuumadda soo bandhigtay Magacyada xubnaha.
