Maraakiibta Dagaalka ee Denmark ayaa dib ugu laabanayo dalkooda, kadib, markii ay muddo 9-sanno qeyb ka ahaayeen Hawlgalka La-dagaalanka burcad-baddeeda ka qowleysaya Xeebaha Somalia.
Maraakiibtaasi oo qeyb ka ahaa Ciiddanka Badda ee Isbahaysiga NATO ayaa waxay gacan ka geysteen sidii ay Maraakiibta Ganacsiga uga waabin lahaayeen Burcad-baddeeda ka qowleysata Badweynta Hindiya iyo Gacan-biyoodka Cadmeed.
Ciiddanka Badda ee dalka Denmark waxay sheegeen muddadii ay qeybta ka ahaayeen Hawlgalkaasi inay  qabteen 295 Eedeysanayaal Burcad-baddeed ah, kuwaasi oo 50 ka mid ah loo gudbiyey Dacwad-oogayaasha dalalka kale.
Hadal ka soo baxay Taliska Ciiddanka Badda ee Denmark ayaa lagu sheegay inay Ciiddanka iyo Maraakiibta Dagaalka ee ka joogay Xeebaha Somalia loo wareejiyey inay ka hawl-galaan Badda Mediterranean Sea, halkaasi oo ay Tahriibayaal badan oo doonyaha ku safra u baahan yihiin Gurmad Degdeg ah.
Si kastaba ha ahaatee, ma kala cadda haddii ay Ciiddanka Badda ee Denmark ama kuwa kale ee dalalka xubnaha ka ah Isbahaysiga NATO ka huleelaan Badda Somalia inay taasi horseedi karto inay Burcad-baddeeda mar kale dib u soo laba-kacleeyaan.
©Radio Dalsan
