Hab-dhaqanka Dowladda Federalka Somalia waxay mararka qaarkood u muuqdaan kuwo sidii Dowladihii KMG u garba-duuban, isla markaana ay Hay’addo ama Dowlad kale qabanayaan Shaqooyinka Ummadda ee Dowladda Federalka loo idmaday.
Garba-duubkii u dambeeyey ayaana ah Hawl-qabadkii Dowladaha deriska ee xubnaha ka ah Urur-gobaleedka IGAD oo iyagu gogol nabadeed ku dhigay gudaha Somalia, gaar ahaan Degmadda Dolow Somalia, Â iyagoo aan Dowladda Somalia kala tashanin Gogoshii lagu heshiisiiyey Maamulka KMG ee Jubba (IJA) iyo Madaxda Gobalka Gedo ee nidaam ahaan ayidsan Dowladda Federalka.
Siyaasiyiinta madaxa bannaan ayaa rumeysan in Heshiiskaasi laga  ahaa Siyaasad dhagareed, waxaana taasi u daliil ah sida Taatikada Khiyaanadda ee IGAD iyo Maamulka Jubbooyinka saxiixa uga qaateen Guddoomiyaha Gobalka Gedo, Maxamed Cabdi Kaliil, kadibna uu Hoggaamiyaha Maamulka KMG Jubbooyinka, Axmed Madoobe ka shaaciyey Madasha ay Wakiiladda IGAD joogeen inuu xilkii ka qaaday Guddoomiyihii Gobalka Gedo.
Waa hubaal in uu Axmed Madoobe oo xilligiisa dhamaad joogo ayaa lagu wadaa inuu dhawaan isku soo taago Doorasho, iyadoo aysan Dowladda Federalka wax gacan Maamul ah ku lahayn Doorashadda Madaxtinimadda ee ka dhici doonta magaalladda Kismaayo.
Doorashadda Degdegga ee uu Axmede Madoobe ku doonayo si isaga mar kale lagu soo doorto iyo Xil-qaadista Guddoomiyaha Gedo ayaana ah Su’aal Siyaasadeed jawaabteeda laga dhowrayo Dowladda Federalka oo iyadu u muuqata Dowlad aan Feejignayn.
Mas’uuliyiinta Dowladda Federalka waxay ka gaabsadeen  inay ka hadlaan Faragelinta IGAD, Shirkii Doolow, Maamul-u-samaynta Jubbooyinka iyo Awoodda Axmed Madaoobe ee Xil-ka-qaadista Guddoomiyaha Gobalka Gedo ee Maamulka Dowladda Federalka oo laga dareemayo quursi Siyaasadeed iyo mid lagu liidayo Awoodda Dowladda Federalka.
Waa hubaal inay Urur-gobaleedka IGAD gacmaha kala bixi doonin Arrimaha Jubbooyinka, iyadoo la og yahay inay marti-geliyeen Shirkii Addis Abeba ee lagu soo yegleelay Maamulka KMG ee Jubba (IJA).
Si kastaba ha ahaatee, Dowladda Federalka ayaa la habboon inay si cad u muujiyaan Bareerahooda ku aadan Faragelinta IGAD ee Arrimaha Dakhliga iyo Doorashadda la dedejinayo ee lagu dooran doono Maamul-gobaleedka Jubba, iyadoo la og yahay inay jiraan cabashooyin ay muujinayaan inta badan Beelaha wada degga Jubbooyinka.
Haddii ay Dowladda Federalka ka sii aamusnaato arrimahaasi taagan waxay xaajaddu la micno noqon kartaa Murtidii hooriskeedu ahaa Awood baan jirin xaggeyga, Afkii baa juuqda gabay.
© Radio Dalsan
