Hadal qoraal oo ka soo baxay Ciiddanka Badda ee dalka Britain ayey ku sheegeen inay ku0dhawaad 100 Tahriibayaal ah ka soo badbaadiyeen Badda Mediterraneanka.
Markabka Dagaalka ee The Bulwark ayaa la sheegay inuu u gurmaday Dooni waday Tahriibayaal oo ku ciladowday meel ka baxsan Xeebaha dalka Libya
Tahriibayaasha ayaa la soo badbaadiyey ka hor intaysan doonidii ay la socdeen ku deign badda.
Ciiddanka Badda Talyaaniga ayaa isaga sheegay inay soo badbaadiyeen 120 Tahriibayaal la socday dooni ka timid Libya.
Dhinaca kale, Markab ay leeyihiin Ciiddanka Badda dalka Jarmalka ayaa la sheegay inuu shalay oo Jimco ahayd soo badbaadiyey in ku dhow 200 Tahriibayaal la socday dooni ku sugnayd Badda Mediterraneanka.
Hadal ka soo baxay Wasaaradda Gaashaandhigga Jarmalka, ayaa sheegay inay qeylo-dhaan ka heleen Talyaaniga si loogu gurmado dooni Tahriibayaal waday oo ku sugnayd meel ku-dhawaad 250-KM dhanka Koonfurta kaga toosnaa Jesiiradda Lampedusa.
Markabka Hessen oo ay Mariniska Jarmalka wateen ayaa u gurmaday doonidaas, iyadoo Tahriibayaasha si nabad ah lagu soo gaarsiiyey Jesiiradda Lampedusa.
In ka badan 5,000 oo Tahriibayaal ah ayaa ku geeriyootay Badda, 18-kii bilood ee la soo dhaafay.
