Afar Muwaadin oo Somali ah ayaa la sheegay in lagu ganaaxay midkiiba lacag dhan 5.5 million ee Shillinka Kenya ama Xabsi min 10-sanno ah.
Muwaadiniintaasi oo magacyadooda lagu kala sheegay Zakariya C/llaahi Axmed, C/qaadir Shariif Cabdinuur, Ubax C/raxmaan Xasan iyo Faadumo Canshuur ayaa la sheegay in isbuucii hore lagu qabtay iyagoo Garoonka Diyaaradaha Mandera ka raaci lahaa Diyaarad ku soo jeeday magaalladda Nairobi.
Boliska Mandera ayaa ku soo oogay dadkaasi inay wateen Fiisooyin Kenyan oo aysan iyaga lahayn iyo inay Sharci la’aan ku joogeen Kenya.
Eedeysanayaasha waxay sheegeen in lagu khiyaaanay Fiisaha, loona sheegay inay ku tegi karaan Nairobi, waxayna dhamaantooda ka codsadeen Maxkamadda Mandera in la cafiyo.
Ilo-wareed ku dhow Boliska, waxay sheegeen inay Eedeysanayaasha u fududeeyeen Dukumentiyadda qaar ka mid ah Saraakiisha Boliska Kenya ee joogta Xuduudka iyo Wakiil ka tirsan Shirkadaha Diyaaradaha Maxaliga ee ka dhex shaqeeya Kenya.
Garsooraha Sare ee Maxkamadda Mandera, Peter Areri waxa uu dhega kafuraystay Qirashadda Eedeysanayaasha, wuxuuna ku xukumay min 5.5 million oo Shillinka Kenya ama Xabsi min 10-sanno iyo in Somalia loo masaafurin doono marka ay Xukunka dhamaystaan.
Eedeysanayaasha ayaa la siiyey 14 maalmood oo ay Racfaan kaga qaadan karaan Xukunadda lagu kala xukumay.
Dhinaca kale, Maryam Bashiir Cabdi ayaa la filayaa in bishan Feberaayo 9-da la soo taago Maxkamadda Mandera, iyadoo lagu soo oogay inay sannadkii 2012-kii  ka dalbaday Maamulka Degmadda Isiyolo in loo sameeyo Waraaqaha Aqoonsiga Kenya.
Haweeneydaasi ayaa la sheegay inay bishii hore ee Janaayo 28-dii lagu qabtay Xuduudka Kenya iyo Somalia, balse waa la sii daayey, inkastoo  mar kale la qabtey xilli ay ku sii jeeday Nairobi.
©Radio Dalsan
