Ciidanka Kumaandooska Xoogga dalka Soomaaliyeed ee DANAB ee ku sugan magaalada Kismaayo ee Xarunta Gobolka Jubbada Hoose ayaa gacanta kusoo dhigay Nin la sheegay inuu Bam gacmeed ku tuuray saraakiil ka tirsan ciidanka DANAB.
Ciidanka ayaa ninkan gacanta ku dhigay, ka gadaal markii uu Bam gacmeed ku tuuray guri ku yaalla xaafad ka tirsan magaalada Kismaayo oo ay degnaayeen saraakiil ka tirsan ciidanka Kumaandooska, waxaana la tilmaamay in ninka marka hore uu baxsaday.
Saraakiil ka tirsan ciidanka DANAB ayaa laga soo xigtay in ninka weerarka geystay oo lagu magacaabo Abshir Mowlid Axmed uu damcay inuu falka kadib goobta ka baxsado, balse ciidanka ayaa cayrsaday kana soo saaray xaafad uu ku dhuuntay.
Abshir ayaa hadda waxa uu ku jiraa gacanta ciidanka Kumaandooska DANAB, isaga oo baaritaan lagu sameeyo ku sheegay ineey jiraan bambooyin u kaydsan damacsanaana inuu falal amni darro oo kale ka gaysto magaalada Kismaayo.
