Wasiirka Wasaaradda Arrimaha Gudaha Federaalka Xukuumadda Federaalka ee xilgaarsiinta Jeneraal Mukhtaar Xuseen Afrax ayaa daahfuray ansixinta Siyaasadda Qaran ee Maamul Daadejinta iyo Federaalaynta Dalka.
Wasiirka ayaa sheegay in muddo ay Wasaaradu ku hawllaneyd inay dhammaystirto xoojisana hannaanka Maamul Baahinta Dalka, si taas loo gaaro Wasaaraddu waxay isku hawshay inay dhammaystirto Siyaasadda Qaran ee Maamul Daadejinta iyo Federaalaynta Dalka.
Jeneraal Mukhtaar ayaa tilmaamay inay latashiyo la sameeyeen dhammaan hay’adaha dowladda heer Federaal, Dowlad Goboleed iyo Maamulka Gobolka Banaadir, si loo xaqiijiyo in geeddi socodkaan qayb laga ahaa.
Sidoo kale, Wasiirka ayaa  Carabka ku dhuftay in ka Wasaarad ahaan ay ku dadaalayaan in la dhaqan geliyo hannaanka Federaalka iyo Daadejinta Maamulka Dalka si waafaqsan Dastuurka dalka.
Ugu dambayntii, Wasiirka Wasaaradda ayaa u mahad celinayay cid kasta oo gacan ka gaysatay dhammaystirka Siyaasaddan hay’adaha Dowladda iyo hay’adaha bah-wadaagta la ah Wasaasaradda.
Wasiirka Wasaaradda Hawlaha Guud, Dib u dhiska iyo Guriyeynta xilgaarsiinta Maxamed Aadan ayaa Maamul-daadejintu ku micneeyay in ay muhiim tahay in shacabka Soomaaliyeed ee ku nool meelaha ka fog magaalooyinka waaweyn ay awood u yeeshaan in ay helaan adeegyada dowlada.
