Magaalada Jowhar ee Caasimadda Maamulka Hirshabeelle ayaa waxaa la filayaa in mar kale halkaas ay ka dhacdo doorashada kuraas ka tirsan Aqalka Sare ee Baarlamaanka Soomaaliya ee laga soo dooranayo deegaanada Maamulkaas.
24 Musharax ayaa ku tartamaya 5 kursi oo ka harsan kuraasta Aqalka Sare ee Hirshabeelle, waxaana doorashada ay saacadaha soo socda ka bilaaban doontaa Xarunta Xildhibaanada Baarlamaanka Maamulka.
Kursiga ugu adag ee doorashada Maanta ka dhaceysa Jowhar ayaa waxaa ku loolami saddex Musharax oo kala ah Cismaan Maxamuud Maxamed Dufle, Safiirka Soomaaliya ee Kenya Maxamuud Axmed Nuur Tarsan iyo Raage Xasan Cismaan Xuuti.
Musharaxiinta doorashada ku tartameysa ayaa saacadihii lasoo dhaafay kulamo siyaasadeed la yeeshay Xildhibaanada Hirshabeelle, waxaana Caasimadda Maamulka ka socda olole doorasho oo xoog leh.
Doorashadii xalay ka dhacday Jowhar ayaa waxaa kursiga koowaad ee Aqalka Sare ee Hirshabeelle ku guuleystay Muuse Suudi Yalaxow, halkan labaad loo doortay Nuur Maxamed Canjeex iyo mid saddexaad oo ay ku guuleysatay Fartuun Cabdulqaadir Faarax Karaama oo Cod gacan taag lagu doortay.
Ammaanka guud ee Caasimadda Maamulka ayaa siweyn loo adkeeyay, waxaana sugida amniga iska kaashanaya Ciidanka Hirshabeelle iyo kuwa Booliska dowladda Federaalka ee Haramcad, iyagoona xiray inta badan waddooyinka gala Xarunta Baarlamaanka.
