Waxaa faah faahino dheerad ah ay ka soo baxayaan weerar xalay xilli dambe dagaalamayaal ka tirsan Al-Shabaab ku qaadeen Xarun Ciidamo ka tirsan kuwa dowladda Soomaaliya ay ku leeyihiin degmada Afgooye ee Gobolka Shabellaha Hoose
Al-Shabaab ayaa weeraray fariisin ay Ciidamada Dowladda Soomaaliya ku leeyihiin Buundayarey ee degmada Afgooye,waxana halkaasi ka dhacay dagaal culus oo leysku adeegsaday hubka noocyadiisa kala duwan.
Dad ku sugan Afgooye ayaa waxa ay sheegeen in dagaalkaas uu geystay khasaaro isugu jira dhimasho iyo dhaawac,iyaga oo xaqiijiyey dhimashada saddex ruux oo laba ka mid ah ay yihiin askarta dowladda iyo qof kale oo Shacab ah.
Dhinaca kale Saraakiisha xoogga dalka Soomaaliya ee gobolka Shabeellaha Hoose ayaa waxa ay sheegeen inay iska-difaaceen weerarkii kaga yimid dhinaca Al-Shabab.
Al-Shabaab ayaa ayaa waxa ay sheegeen in weerarka ay ku qaadeen degmada Afgooye ay ku dileen 5 askari oo ka tirsan Ciidamada Dowladda,isla markaana intii uu dagaalka socday ay la wareegeen inta badan degmada Afgooye.
Dadka ku nool Afgooye ayaa xalay waxaa soo wajahday cabsi xooggan oo ay ka qabaan in ay waxyeelo ka soo gaarto dagaalka mar walba ka dhaca degmada Afgooye oo Al-Shabaab ay soo weeraraan.
Wararka aan saakay heleyno ayaa waxa ay sheegayaan in xaalada degmada ay tahay mid degan,isla markaana Goobihii lagu dagaalamay ay Ciidamada Dowladda Gacanta ku hayaan.
