Masuuliyiin ka socota Maamulka Kumeelgaarka ee SSC-Khaatumo ayaa soo gaaray Magaalada Muqdisho ee caasimadda dalka, iyadoo safarka Guddoomiyaha Baarlamaanka SSC-Khaatumo Jaamac Yaasiin uu yahay mid shaqo.
Guddoomiye Jaamac Yaasiin waxaa si diirran ugu soo dhaweeyay Garoonka Diyaaradaha Aadan Cadde, halkaas oo uu ku jiray kulanka masuuliyiin ka tirsan Dowladda Federaalka.
Socdaalka Guddoomiyaha ayaa ah mid lagu xoojinayo xiriirka iyo wada shaqeynta Maamulka Kumeelgaarka ee SSC-Khaatumo iyo dowladda federaalka.
Guddoomiye ku xigeenka labaad ee Golaha Aqalka Sare Cabdullahi Xirsi Timacadde, Wasiirka Tamarta iyo Khayraadka Biyaha ee XFS Cabdullahi Bidhaan Warsame, iyo xubno ka tirsan Golaha Shacabka ayaa sidoo kale ka mid ahaa masuuliyiinta ka soo qeyb galay soo dhaweynta Guddoomiyaha Baarlamaanka SSC-Khaatumo.
Waxaa la filayaa in Guddoomiyaha Baarlamaanka SSC-Khaatumo uu kulamo la qaato mas’uuliyiinta dowladda iyo Guddoomiyaha Baarlamaanka Federaalka ee Muqdisho, si loo adkeeyo xiriirka iyo iskaashiga labada dhinac.