Edmundo Gonzalez, oo ah musharraxa xisbiga mucaaridka ee doorashadii madaxtinimada Venezuela ee bishii July, ayaa gaaray dalka Spain halkaas oo uu ka helay magan-galyo siyaasadeed. Gonzalez ayaa ka tagay Venezuela xalay, kaddib markii uu muddo toddobaadyo ah ku jiray xaalad siyaasadeed oo kacsan oo ka dhalatay natiijada doorashadii uu kula tartamay Madaxweyne Nicolas Maduro.
Guddiga doorashada ayaa ku dhawaaqay in Maduro uu doorashada ku guuleystay si aqlabiyad leh, hase yeeshee mucaaridka ayaa ku dooday in codadka la musuq-maasuqay. War kasoo baxay Wasaaradda Arrimaha Dibadda ee Spain ayaa lagu sheegay in Gonzalez iyo xaaskiisa ay kasoo dageen saldhigga militariga ee Torrejon de Ardoz, oo ku yaalla magaalada Madrid.
Ka soo cararista dalkiisa Venezuela waxay dhacday toddobaad kaddib markii xukuumadda Maduro ay soo saartay amar lagu soo xirayo Gonzalez. Dowladaha Mareykanka, Midowga Yurub, iyo qaar ka mid ah quwadaha caalamiga ah ayaa rumeysan in Gonzalez, oo 75 jir ah, uu dhab ahaan ku guuleystay doorashadii madaxtinimada ee Venezuela.
