Baarlamaanka Jamhuuriyadda Federaalka Soomaaliya, oo fadhiyadooda la baajiyey saddexdii maalmood ee lasoo dhaafay, waxaana dhammaan Xildhibaanada lagu wargeliyay inay soo xaadiraan.
Baajinta kulamadii hore ayaa dhalisay hadal hayn ku saabsan mooshin ay gudbiyeen qaar ka mid ah xildhibaannada, kuwaas oo ka horyimid tallaabooyin ay qaadeen mudanayaal kale. Inkastoo murankaasi markii dambe la xalliyey, ma jirin faahfaahin rasmi ah oo laga bixiyay sababta kulamadu u baaqdeen.
Xildhibaannada Golaha Shacabka waxaa horyaalla qodobo muhiim ah oo ay weli qabyo yihiin, kuwaas oo u baahan in dood iyo dhageysi lagu sameeyo. Sidoo kale, qodobo kale ayaa weli sugaya in guddiyada gaarka ah ee loo xil saaray ay usoo gudbiyaan baarlamaanka si loo meelmariyo.
Guddoomiyaha Golaha Shacabka ayaa si gaar ah u wargeliyay xildhibaannada in ay hubiyaan joogitaankooda si looga fogaado kooram la’aan, maadaama fadhiga si rasmi ah ku furmayo marka tirada sharciga ah ee xildhibaannada ay buuxsamaan. Kani waa kulan muhiim ah oo lagu xallin doono qodobada dib u dhaca ku yimid iyo mooshinnada taagan, iyadoo la filayo in wax laga qabto arrimaha culus ee horyaalla baarlamaanka.
