Warar dheeraad ah ayaa kasoo baxaya qarax Is-miidaamin ahaa oo loo adeegsaday gaari laga soo buuxiyay waxyaabaha qarxa oo saaka oo jimco ah lagu weeraray deegaanka Laas Gacamey oo u dhexeeya deegaaada Wisil iyo Bacaadweyne ee gobolka Mudug.
Qaraxa oo ahaa mid xooggan ayaa waxaa la sheegay in lagu bartilmaameedsaday goob ay ku sugnaayeen Mas’uuliyiin isugu jiray Madaxweynaha dowlad Goboleedka Galmudug Axmed Cabdi Kaariye Qoorqoor, Xildhibaano ka tirsan Baarlamaanka Federaalka Soomaaliya iyo saraakiil ciidan oo farabadan.
Wararka la helayo ayaa sheegaya in gaariga uu ku qarxay meel aad ugu dhow goobta ay joogeen mas’uuliyiinta ee tuulada Laas Gacamey, isla markaana waxaa waxaa qaraxaas ka dhashay khasaaro dhimasho iyo dhaawac leh oo gaaray Askar iyo Xildhibaano.
Xildhibaan Cabdisalaan Dhabancad oo ka tirsan Golaha Shacabka, kuna sugnaa goobta la weeraray oo la hadlay Idaacadda VOA-da ayaa u sheegay in saaka aroortii lagu soo weeraray gaari qarax ah, uuna dhaawac fudud kasoo gaaray gacanta, kadib markii uu kusoo dumay guriga uu xalay ku hoday.
Sidoo kale waxaa qaraxa uu isna dhaawac kasoo gaaray Senator Cabdi Qeybdiid, waxaana la tilmaamay inuu Senatorka kusoo dhacay dhagax guriga uu isna joogay, halka la xaqiijiyay inuu Madaxweyne Axmed Qoorqoor uu badqabo, oo wax dhibaato ah aysan gaarin.
Taliyaha ciidanka daraawiishta Galmudug Jeneral Maxamed Nuur Cali Gadaar ayaa xaqiijiyay geerida ciidamo ka tirsan madaxtooyada Galmudug iyo dhaawaca askar kale. Taliye Gadaar ayaa sidoo kale sheegay in madaxweynaha Galmudug, mas’uuliyiinta iyo saraakiisha ciidamada ay badqaban.
Warbaahinta ku hadasha afka dowladda Federaalka ayaa ku warrantay in qaraxii ka dhacay Laas Gacamey ay ku dhaawacmeen laba Askari oo ka tirsan ciidanka dowladda Federaalka, dhanka kale Al-Shabaab ayaa sheegatay mas’uuliyiinta qaraxaan.
