Guddiga Komishinka doorashooyinka Maamulka Somaliland ayaa Maanta shaaciyay xilliyada ay dhacayaan doorashooyinka Madaxtooyada iyo tan xisbiyada siyaasadeed ee Maamulkaas, kadib War-saxaafadeed kasoo baxay Guddiga.
Warka Guddiga doorashooyinka Somaliland ayaa waxaa lagu sheegay in doorashada xisbiyada lasoo hormarinayo, isla markaana la qabanayo 28-ka bisha December ee sanadkaan 2023-ka, si loo helo saddex xisbi oo ansaxsan, lana siiyo shahaadada.
Sidoo kale Guddiga Komishinka ayaa shaaca ka qaaday in doorashada Madaxweynaha iyo Madaxweyne ku-xigeenka Somaliland ay dhacayaan 13-ka November 2024-ka, waxayna Guddiga sheegeen in bil kahor uu xilligaas dhamaanayo muddo xileedka Madaxweynaha iyo ku-xigeenkiisa.
Jadwalkan doorashada ay soo saareen komishinka doorashada Somaliland ayaan la ogeyn sida ay u aqbali doonaan xisbiyada mucaaradka, kuwaa oo horey u doonayay in doorashada madaxweynaha iyo kuxigenkiisa lasoo hormariyo.
Mucaaradka ayaa horay si adag uga horyimid in lasoo hormariyo doorashada Xisbiyada, ayna tahay in marka hore loo dareero doorashada Madaxtooyada, waxaana Jadwalka lasoo saaray uu u muuqdaa mid uga sii daraya khilaafka ka taagan doorashooyinka.
