Dhawaaqa hub culus ayaa laga maqlay qeybo ka mid ah magaalada Garoowe ee xarunta maamul goboleedka Puntland, Weriyeyaal iyo dad magaalada degan oo la hadlay warbaahinta ayaa ku sheegay in dhawaaqa hub la maqlay uu yahay hub ay tijaabo ahaan u ridayaan ciidamo gadoodsan oo kasoo horjeeda in la furo dastuurka maamulka.
Wararku waxaa ay intaa ku darayaan Ciidamada la baxay Danab ee diiddan doorashada qof & cod iyo furista dastuurka in saaka lagu arkayo qaybo ka mid ah caasimadda maamulka Puntland ee Garoowe.
Waxaana arrintaani ay timid ka dib markii xalay uu maamulka Puntland ee uu horkacayo Deni ay ciidamada madaxtooyada iyo kuwa PMPMF ku adkaysay ammaanka xarunta Baarlamanka, Madaxtooyada iyo jidka wadnaha.
Dhaqdhaqaaqyadan ayaa ku soo aadaya, iyada oo la filayo in Golaha Wakillada maanta loo gudbiyo dalabka kordhinta xildhibaannada gobolka Muudg oo waayadan ay wadeen mudanayaasha degmada Galdogob.
Sidoo kale, ciidamo kale oo kuwa dowladda ah ayaa lagu arkayaa qeybo wadooyinka muhiimka ah ee magaalada, xarumaha dowladda iyo tan baarlamaanka.
