Warar dheeraad ah ayaa kasoo baxaya Israsaaseen ka dhacday Garoonka diyaaradaha Magaalada Laascaanood ee Xaruunta Gobolka Sool, waxaana Israsaaseyntaasi ka dhashay Khasaare kala duwan sida wararku sheegayaan.
Wararkii ugu dambeeyay ee ina soo gaaraya ayaa sheegaya in ku dhawaad afar qof ay ku dhaawacmeen is-rasaaseyntaasi ka dhacday Magaalada Lascaanood gaar ahaan Goroonka diyaaradaha.
Is-rasaaseyntaasi ayaa timid kadib markii labo malleyshiyo oo hubaysan ay isku rasaaseeyeen Gudaha garoonka, sida wararka aynu helnay ay tilmaamayaan.
Sababta ka dambeysay in dagaalku ka dhaco gudaha garoonka diyaaradaha ayaa lagu sheegay in labada dhinac ee is-rasaaseyay ay kala taageersanaayeen labo ganacsade oo qaadku u soo dego.
Wali laamaha ammaanka iyo maamulka Magaalada wax war ah kama soo saarin shaqaaqadaasi ka dhacday gudaha garoonka diyaaradaha ee magaalada Laascaanood, waxaana goobaha caafimaadka la gaarsiiyay dadkii ku waxyeeloobay dirirtaasi.