Madaxweynaha Jamhuuriyadda Federaalka Soomaaliya Xasan Sheekh Maxamuud oo qaar ka mid ah dalalka xiriirka soojireenka ah la wadaaga dalka ku maraya socdaal ku saleysan dib u xoojinta iskaashiga diblumaasiyadda iyo xaqiijinta Soomaali heshiis la ah dunida ayaa maanta u amba-baxay Jamhuuriyadda Carbeed ee Masar.
Madaxweynaha ayaa dhiggiisa dalka Masar Cabdulfataax Al-siisi, la yeelan doona wadahadallo ku aaddan sidii loo xoojin lahaa xiriirka soojireenka ah ee ka dhexeeya labada dal ee walaalaha ah.
Labada Madaxweyne ayaa sidoo kale ka wada arrinsan doona iskaashiga dhaqaale iyo diblumaasiyadeed, waxa loogu yeero la dagaallanka argagixisada iyo dib u soo celinta doorka dowladda Masar ee horumarinta waxbarashada dalka.
Booqashadan Madaxweynaha Jamhuuriyadda Federaalka ee Masar ayaa noqday tii 7-aad uu dibedda ku aaday tan iyo markii dib loo doortay 15-kii May, kadib safaradii Imaaraadka Carabta, Turkiga, Eritrea, Kenya, Jabuuti iyo Tanzania.
Masar ayaa ka mid aheyd dalalkii ugu horreeyey ee casuumadda usoo diray Madaxweyne Xasan Sheekh Maxamuud markii dib loo doortay, iyadoo oo la rumeysan yahay in Qaahira ay guushii Xasan Sheekh u aragtay faa’iido weyn.