Dabkaan oo geystay khasaaro hantiyadeed oo farabadan ayaa waxaa uu ka kacay Guri ku yaalla xaafadda howlwadaag ee Magaalada Baladweyne ee Xarunta Gobolka Hiiraan ee dowlad Goboleedka Hirshabeelle, waxaana kasoo baxaya faah faahino dheeraad ah.
Qaar kamid ah dad Goobjoogayaal ah ayaa waxaa ay ku warrameen in dabka uu ahaa mid xoogan oo daqiiqado dhowr ah socday, isal markaana uu ka kacay Guri ay deganaayeen dad shacab ah, balse markii dambe lagu guuleystay deminta dabka.
Dabka ayaa waxaa uu baabi’iyey dhismaha Gurigii uu ka kacay ee ku yaallay xaafadda howlwadaag ee Magaalada Baladweyne, waxaana Guriga laga bixiyey oo ku sugnaa Carruur yaryar, mana jiro khasaaro nafeed oo ka dhashay dabkaas kacay.
Dadka deriska la ah Guriga uu dabka ka kacay ayaa waxaa ay sheegeen in uu dabka ka bilowday Koronto ku jirtay Guriga,  isla markaana uu baabi’iyay gurigaas oo ka dhisnaa Jiingad, ayna ku noolaayeen qoysas deganaa.
Sawirro laga soo qaaday guriga ayaa muujinayey baaxada uu lahaa dabka ka kacay, waxaana gurmadkii lagu demiyey dabka ka qeyb qaatay dadka deegaanka xaafadda howlwadaag ee Magaalada Baladweyne ee Xarunta Gobolka Hiiraan.
