Afhayeenka Xukuumadda Federaalka Soomaaliya Maxamed Ibraahim Macalimuu ayaa galabta gaaray Magaalada Baladweyne ee Xarunta Gobolka Hiiraan, isagoo halkaas ay kusoo dhaweeyeen xubno ka tirsan Maamulka Gobolka iyo kan Baladweyne.
Afhayeen Macalimuu ayaa u tartamaya kursi kamid ah kuraasta Golaha Shacabka Baarlamaanka 11-aad ee dowladda Federaalka ee Soomaaliya, kaasi oo ay deegaan doorashadiisa tahay Hirshabeelle gaar ahaan Baladweyne.
Afhayeenka Xukuumadda Federaalka Soomaaliya Maxamed Ibraahim Macalimuu ayaa Maanta dib ugu soo laabtay Magaalada Muqdisho oo markii hore looga qaaday xaalad Caafimaad, kadib markii uu ku dhaawacmay qarax Is-miidaamin ah oo lala beegsaday.
Macalimuu ayaa warbaahinta ka sheegay in uusan weli ka tanaasulin kursiga Golaha Shacabka ee uu doonayo, wuxuuna rajeeyay in Beeshiisa iyo Maamulka Hirshabeelle ay fursad usiin doonaan inuu dalka u adeego.
Maxamed Ibraahim Macalimuu ayaa 16-kii Janaayo 2022 lala beegsaday qarax Is-miidaamin ah oo uu fuliyey qof isku soo xiray Jaakad waxyaabaha qarxa ah, waxaana soo gaaray dhaawac, isagoona loo qaaday dalka Turkiga oo xaaladdiisa Caafimaad lagu soo daaweeyay, wuxuuna Maanta soo laabtay isaga oo Caafimaad qaba.