Madaxweynaha dowlad Goboleedka Cali Cabdullaahi Xuseen Guudlaawe ayaa tacsi tiiraanyo leh u diray qoysaska qaraabada iyo dhamaan shacabka Soomaaliyeed ee ku naf waayay qaraxii Al-shabaab ay la beegsadeen Baar Xasan dhiif ee Magaalada Beledweyne ee Xarunta Gobolka Hiiraan.
Madaxweynaha Hirshabeelle ayaa amray laamaha kala duwan ee amniga inay xaqiijiyaan amaanka Magaalooyinka Beledweyne iyo Jowhar oo ay ka socdaan doorashooyinka Golaha Shacabka Baarlamaanka Federaalka Soomaaliya
Madaxweyne Cali Guudlaawe Xuseen ayaa Alle uga baryay Masuuliyiintii iyo shacabkii ku geeriyootay qaraxii Maanta in uu hoygooda ka yeelo Jannatul Firdowsa, inta ku dhaawacantayna uu Eebbe u boogo dhayo.
Ugu yaraan 15 qof ayaa ku dhintay qaraxa oo ay ku jiraan Mas’uuliyiin ka tirsanaa Hirshabeelle, Musharaxiin Xildhibaano iyo dad kale, halka 30 qof kalena ay dhaawacyo soo gaareen, waxaana mas’uuliyadiisa sheegtay qaraxaas Al-shabaab, iyagoona tilmaamay inay la beegsadeen Mas’uuliyiin iyo Saraakiil ka tirsan Hirshabeelle..
Qaraxaan ka dhacay Baladweyne ayaa waxaa uu kusii aaday, iyada oo maalinta berri ay Magaaladaas ka bilaabaneyso doorashada Golaha Shacabka Baarlamaanka 11-aad ee dowladda Federaalka, waxaana lagu dooranayaa ilaa lix kursi.
