Fadhiga 3-aad ee Guddiga joogtada ah Golaha Wakiillada Dowlad Goboleedka Puntland oo uu shir-Guddoomiyey Guddoomiyaha Golaha Wakiillada DPL Mudane, Cabdirashiid Yuusuf Jibriil oo ay weheliyaan Guddoomiye ku xigeenka 1-aad ee Golaha Wakiillada, Cabdicasiis Cabdullaahi Cismaan iyo Guddoomiye ku xigeenka 2-aad Ismaaciil Maxamed Warsame ayaa maanta ka qabsoomay hoolka shirarka guddiga joogtada ah ee xarunta Golaha Wakiillada.
Fadhiga maanta ayaa madax-gudiyeedyada looga dhagaystay warbixino la xiriira arrimaha bulshada, amniga, dhaqaalaha, dhammaystirka Goleeyaasha Deegaanka iyo arrimaha garsoorka.
Dood iyo falanqeyn dheer ka dib, Guddiga Joogtada ahi waxay go’aamiyeen in guddi gaar ah loo saaro dhammaystirka xeerka biyaha Puntland, sidoo kale guddigu waxay go’aamiyeen  in loo yeero Wasiirka Wasaaradda Xannaada Xoolaha, si wax looga weydiiyo arrimaha Maxjaradda Puntland, waxaa kale oo ay go’aamiyeen in loo yeero Taliyaha Ciidanka Booliska iyo Taliyaha hoggaanka Dembi-baarista Puntland (CID), si wax looga weydiiyo cabashooyin ku aadan lacago laga qaado dadka qaadanaya warqadda dembi la’aanta.
Ugu dambeyn, Guddiga Joogtada ah waxaa loo qeybiyey saddex xeer oo kala ah Xeerka La-dagaalanka Maandooriyaha Puntland, Xeerka Dalxiiska Puntland iyo Wax-ka-bedelka Xeerka Rugta Ganacsiga iyo Warshadaha Puntland. Xeerar kaas oo Goluhu ku ansixiyey kalfadhigii 49-aad ee Golaha wakiillada, madaxweynuhuna saxiixay, faafinta rasmiga ahna lagu soo saaray, si guddiyadu ay dabagal ugu sameeyaan dhaqangalkooda.