Madaxweynaha dowlad Goboleedka Hirshabeelle Cali Cabdullaahi Xuseen Guudlaawe oo weli ku sugan Magaalada Muqdisho ayaa wada kulamo uu la qaadanayo Wakiilada Beesha Caalamka iyo siyaasiyiinta.
Madaxweyne Cali Guudlaawe ayaa Maanta oo jimco ah hoyga uu ka degan yahay Muqdisho ku qaabilay Guddoomiyaha Aqalka Sare ee Baarlamaankii 10-aad ee dowladda Federaalka Cabdi Xaashi Cabdullaahi.
Madaxweynaha Hirshabeelle iyo Guddoomiye Cabdi Xaashi ayaa iska waraystay xaaladihii ugu dambeeyay ee Arrimaha siyaasadda dalka iyo dardar-galinta dhameystirka doorashooyinka.
Guddoomiyaha Aqalka Sare ee Baarlamaankii 10-aad ayaa sidoo kale kala hadlay Guudlaawe dhaqan-gelinta qodobadii kasoo baxay Shirkii Golaha Wadatashiga Qaran ee dhawaan lagu soo gaba-gabeeyay Muqdisho, ee lagu muddeeyay doorashada Golaha Shacabka.
Madaxweynaha dowlad Goboleedka Hirshabeelle Cali Cabdullaahi Xuseen Guudlaawe ayaa hore kulamo kala duwan ula yeeshay qaar kamid ah Wakiilada Beesha Caalamka iyo Madaxdii hore ee dalka.
