Midowga Musharaxiinta Madaxweynaha ayaa War cusub kasoo saaray qaabka ay ku socoto doorashada Golaha Shacabka Baarlamaanka 11-aad oo ka socota Magaalada Muqdisho iyo maamulada Galmudug iyo Koonfur Galbeed.
War-saxaafadeed kasoo baxay Midowga Musharaxiinta ayaa waxaa lagu caddeeyay in aysan aqbali doonin doorashooyinka deegaanada qaar ee lagu bilaabay boob qaawan oo la isu awood sheegtay.
Golaha ayaa tilmaamay in lagu tuntay habraacyadii doorashada ee lasoo saaray , taasoo halis gelineysa xasiloonida dalka iyo jiritaanka dowladnimada, sida lagu sheegay Warka Midowga.
Sidoo kale Midowga ayaa xusay inay sii wadi doonaan kulamada, isla markaana ay ka shaqeyn doonaan sida ugu haboon oo dalka looga hirgelin lahaa doorasho hufan oo daah-furnaan leh, laguna badbaadiyo masiirka dalka iyo geedi-socodka dhismaha nabada.
Midowga Musharaxiinta ayaa maalmahan leh shirar dhexdooda, sidoo kale ay kulan la yeelanayaan Ra’iisul Wasaaraha Xukuumadda xilgaarsiinta Maxamed Xuseen Rooble iyo qeybaha kala duwan ee Bulshada iyo Beesha Caalamka.
