Qarax miino nooca dhulka lagu aaso ah ee laga hago meelaha fog-fog ayaa waxaa barqanimadii Maanta duleedka Magaalada Jowhar ee Caasimadda Hirshabeelle lagula eegtayb gaari ay la socdeen Ciidamo ka tirsan kuwa kumaandooska DANAB.
Qaraxa ayaa waxaa uu gaariga ay la socdeen Ciidanka oo ahaa Cabdi Bile ku qabsaday degaan lagu magacaabo Sabuun oo dhinaca bari ka xiga Jowhar, waxaana laga helayaa faah faahino.
Khasaaro isugu jira dhimasho iyo dhaawac ayaa lasoo weriyey inuu ka dhashay qaraxaas lala eegtay Ciidanka Mareykanka tababar ee DANAB, in kastoo aan la xaqiijin inta uu la egyahay khasaaraha.
Ciidamada ayaa la tilmaamay inay kasoo baxeen Caasimadda Hirshabeelle, iyagoona kusii jeeda deegaanka Biyo-cadde ee Gobolka Shabeellaha Dhexe, waxaana Al-shabaab oo ka hadashay qaraxaas ay sheegteen inay ku dileen Askar, uuna burburay gaariga ay la socdeen Ciidanka.
Weli ma jiro wax hadal ah oo kasoo baxay Saraakiisha Ciidanka dowladda Federaalka iyo Maamulka Hirshabeelle oo ku aadan qaraxaas khasaaraha geystay ee ka dhacay deegaanka Sabuun.
Al-shabaab ayaa Jimcihii lasoo dhaafay Qarax Is-miidaamin ah oo loo adeegsaday gaari laga soo buuxiyay waxyaabaha qarxa ku weerartay Saldhig Ciidanka Milateriga dowladda ku leeyihiin Biyo-cadde, waxaana qaraxaas uu geystay khasaaro dhimasho iyo dhaawac.