Ciidanka Booliska dowlad Goboeedka Hirshabelle ayaa gacanta ku dhigay Nin hubeysan oo weerar loo adeegsaday Bam gacmeed ku tuuray fariisimo Ciidanka Booliska Maamulkaas ay ku leeyihiin Magaalada Jowhar ee Caasimadda Hirshabeelle.
Ninka weerarka geystay ayaa markii hore isku dayay inuu baxsado, hayeeshee Ciidamo Boolis ah oo ka agdhawaa goobta ayaa qabtay, waxaana uu bambada uu ku tuuray Ciidamo ku sugnaa Warshaddii hore Isnaay ee sonkarta ee xaafadda Horseed ee Jowhar.
Laamaha amniga Booliska Hirshabeelle ayaa sheegay in Ninka la qabtay haatan uu xiran yahay, isla markaana ay ku socdaan baaritaano kala duwan, ayna markii baaritaanka soo dhammaado sharci la horgeyn doono.
Sidoo kale Saraakiil u hadlay Booliska Maamulka ayaa tilmaamay in Ninka Bam gacmeedka ku tuuray Ciidamada ku sugnaa Warshaddii hore Isnaay ee sonkarta ay warbaahinta u soo Bandhigi doonaan.
Magaalada Jowhar ayaa waxaa marar kala duwan ka dhacay weeraro loo adeegsaday Bam gacmeed oo lagu tuuray fariisimo ay leeyihiin Ciidanka Booliska Hirshabeelle, waxaana weerarada qaarkood ka dhashay khasaaro.
