Wasiirka Arrimaha Gudaha ee Kenya, Joseph Nkaissery waxa uu Xafiiskiisa kula kulmay Siyaasiyiin iyo Odayaal-dhaqameed ka socda mid ka mid ah Beelaha deggan Gedo iyo Jubbooyinka oo uu kala hadlay sugidda Ammaanka Xuduudka iyo inay iskaashi la yeeshaan Ciiddanka Kenya ee ka hawlgala Goballaddaasi.
Wasiirka waxa uu ku booriyey Madaxda Beesha uu la kulmay inay ka shaqeeyaan Ammaanka iyo inay labada dhinac si wadajir ula dagaalamaan Kooxaha uu ugu yeeray Argagixisadda ee dhibaatooyinka u geysta Kenya, waa sida uu hadalka u dhigay.
Hoggaamiyayaasha Dhaqanka ee Beeshaasi waxay magaalladda Nairobi ku leeyihiin Shirweyne ay kaga hadlayaan sidii ay gacan uga geysan lahaayeen Deganaanshaha xuduudka labada dal.
Dhinaca kale, Madaxweynaha Maamul-gobaleedka Jubbaland, Axmed Maxamed Islaam ayaa la filayaa inay isaga iyo Mas’uuliyiin ka tirsan Maamulkiisa u ambabaxaan magaalladda Nairobi si ay ula kulmaan Odayaasha Dhaqanka ee haatan ku sugan Nairobi.
Kulankaasi ayaa la filayaa inay Dowladda Kenya dhexdhexaadiso labada dhinac, si loo gaaro Is-faham ku aadan inay si wadajir uga shaqeeyaan Deganaansha Goballadda Jubbooyinka iyo Gedo.
©Radio Dalsan
