Hotelka City Palace Hotel ee magaalladda Muqdisho waxaa gelinkii dambe ee shalay lagu qabtay Xaflad ballaaran oo lagu caleemo saarayey Boqorka Labada Bahood iyo Marooyinka, Boqor C/llaahi Geeddi Shadoor.
Boqolaal ruux oo ka kala socday Siyaasiyiin, Xildhibaano, Duubabka Dhaqanka, Aqoonyahannadda iyo Ururradda Bulshadda ayaana ka soo qeyb galay Munaasabadaasi, iyadoo caleemo-saarka Boqorka laga soo dhaweeyey dalka gudihiisa iyo dibediisa.
Boqor C/llaahi Geeddi Shadoor oo ahaa Siyaasi ayaa ka soo jeeda Qoys Dhaqameed fac weyn, oo 11- fac ilaa haatan isaga kala dambeeyey xilka Boqorka Labada Bahood iyo Marooyinka soo jiray.
Munaasabadda waxaa kaloo lagu soo bandhigay Sawiro Qaddiimi oo caddaynaya Saldanad-dhaqameedka Boqorka Labada Bahood iyo Marooyinka iyo Taariikhda Hoggaan dhaqameedka ee Boqorkan, laga soo bilaabo Awoowgiisa iyo Aabihiisa oo iyagu kaalin wanaagsan ka soo qaatay Halgankii Gobanimadoonka, Midnimadda Ummadda Soomaaliyeed iyo Hawlaha Nabadeynta iyo Dib-u-heshiisiinta.
Boqorka cusub ee shalay la duubay, C/lalahi Geeddi Shadoor ayaa lagu dhaariyey goobta, waxaana loogu hambalyeeyey xilkaasi, iyadoo xubnihii ka hadlay Munaasabadaasi kula dardaarmeen  inuu si hufan ugu shaqeeyo dadka caleemo-saartay, isla markaana ka shaqeeya Midnimadda iyo Wadajirka Ummadda Soomaaliyeed.
Boqor C/lalahi Geeddi Shadoor oo hadal kooban markii la dhaariyey kadib, waxa uu ballanqaaday inuu si Daacadnimo, Xilkasnimo iyo Naf-hurnimo ugu shaqeyn doono dadka soo doortay iyo guud ahaan Ummadda Soomaaliyeed, wuxuuna Ilaahay ka baryey inuu u fudueeyo Xilka Dhaqan ee loo doortay.
Waxa kale oo uu Hambalyo u diray Duubabka Dhaqanka ee Beelaha Soomaaliyeed, gaar ahaan Boqor Burhaan, Malaaqyada Digil iyo Mirifle iyo qaar ka mid ah duubabka dhaqanka Soomaaliyeed.
©Radio Dalsan
