Waxaa lagu wadaa in maanta uu si rasmi ah uga furmo magaalada Muqdisho shirka Golaha Wadatashiga Qaranka, kaas oo lagu wado in lagu gorfeeyo arrimo muhiim ah oo la xiriira mustaqbalka siyaasadeed, amni, iyo hannaanka federaalka ee dalka Soomaaliya.
Shirka oo ah mid muhiim u ah wada-tashiga dowladda dhexe iyo maamul goboleedyada, ayaa wajahay caqabado la xiriira ka-qaybgal la’aanta madaxda qaar ka mid ah dowlad goboleedyada. Maamulada Koofur Galbeed, Hirshabeelle, iyo Galmudug ayaan weli imaan caasimadda, inkastoo warar la helayo ay sheegayaan in laga yaabo inay maanta yimaadaan.
Sidoo kale, Jubbaland iyo Puntland ayaa si rasmi ah u shaaciyay inaysan ka qeyb geli doonin shirka, iyagoo ku eedeeyay dowladda federaalka in aysan si caddaalad ah u maareynin geeddi-socodka wada-tashiga. Labadan maamul ayaa hore u muujiyay dhaliilo la xiriira sida loo wajahay arrimaha doorashooyinka, dastuurka, iyo awood qeybsiga.
Shirka Golaha Wadatashiga Qaranka ayaa diiradda lagu saari doonaa qodobo dhowr ah oo ay ka mid yihiin:
-
Hannaanka doorashooyinka ee 2026 iyo heshiis laga gaaro hab-raaca doorashada;
- Advertisement - -
Dib u eegista dastuurka ku meel gaarka ah si loo helo dastuur qaran oo dhammeystiran;
-
Arrimaha amniga iyo la dagaallanka argagixisada;
-
Xoojinta xiriirka dowladda dhexe iyo dowlad goboleedyada.
Ka maqnaanshaha Jubbaland iyo Puntland ayaa laga cabsi qabaa in uu saameyn ku yeesho midnimada go’aannada ka soo bixi doona shirka. Qaar ka mid ah falanqeeyeyaasha siyaasadeed ayaa tilmaamaya in shirka aanu noqon karin mid matala dhammaan dhinacyada haddii aysan ka qeyb galin dhammaan maamulada xubnaha ka ah dowladda federaalka.
Beesha caalamka ayaa dhankeeda dadaallo ugu jirta in shirku noqdo mid loo dhan yahay, iyadoo ay socdaan kulamo iyo wadahadallo lagu qancinayo madaxda ka maqan in ay kusoo biiraan shirka.
Shirkan ayaa kusoo beegmaya xilli dalka uu wajahayo marxalad adag oo dhinacyo badan leh, iyadoo shacabka Soomaaliyeed ay sugayaan hannaan siyaasadeed oo mideysan, nabad iyo hufnaan leh.
