Dhaqdhaqaaqa Xuutiyiinta Yemen ayaa ku dhawaaqay inay diyaar u yihiin inay mar kale beegsadaan marin-biyoodka muhiimka ah ee gobolka, iyagoo muujinaya taageeradooda Iiraan, xilli uu sii xoogeysanayo dagaalka Bariga Dhexe.
Hoggaamiye ka tirsan Xuutiyiinta ayaa sheegay in ciidamadoodu si buuxda u diyaar yihiin, islamarkaana ay sugayaan waqtiga ku habboon ee ay tallaabo qaadi lahaayeen.
Wararka ayaa tilmaamaya in haddii ay furaan jiho cusub oo dagaal, bartilmaameedkoodu noqon karo marin-biyoodka Bab al-Mandab, oo muhiim u ah isu socodka maraakiibta iyo ganacsiga caalamiga ah, isla markaana xiriir la leh Kanaalka Suweys.
Tallaabadan ayaa laga cabsi qabaa inay sii kordhiso qalalaasaha shidaalka iyo dhaqaalaha adduunka, maadaama marinnada badeed ee muhiimka ah ay halis geli karaan.
Xuutiyiinta, oo horey u carqaladeeyay maraakiibta ku sugan Badda Cas, ayaa weli si rasmi ah ugu biirin dagaalka, balse hadalladooda cusub ayaa muujinaya suuragalnimada inay ku lug yeeshaan.
Xiisaddan sii kordheysa ayaa imaneysa iyadoo ay horey dagaalka ugu lug yeesheen kooxo kale oo xulafada la ah Iiraan, taasoo sare u qaadeysa cabsida laga qabo in dagaalku noqdo mid ballaaran oo saameeya gobolka iyo caalamkaba.