Golaha Shacabka ee Baarlamaanka Federaalka Soomaaliya ayaa maanta si rasmi ah dib uga furmaya xarunta Villa Hargeysa, kaddib hakad siyaasadeed oo muddo kooban hakiyay howlihii baarlamaanka, sababo la xiriira khilaaf siyaasadeed oo horseeday in xildhibaano laga joojiyo ka qeybgalka fadhiyada rasmiga ah.
Dib u furista kulanka ayaa timid kaddib markii xal laga gaaray arrin muran dhalisay, taas oo keentay in 24 xildhibaan, oo ay ku jiraan xubno mucaarad ah iyo qaar kamid ah wasiirrada xukuumadda, dib loogu oggolaado inay ka qeyb galaan kulamada baarlamaanka. Xildhibaanadan ayaa horey looga mamnuucay ka qeybgalka, iyagoo lagu eedeeyay in ay qayb ka ahaayeen mooshinno iyo muranno siyaasadeed oo la xiriiray hoggaanka Golaha.
Inkastoo fasaxa xildhibaanadan uu muujinayo horumar, hadana xiisadda siyaasadeed ee u dhaxeysa guddoonka Golaha Shacabka iyo xildhibaanada mucaaradka ah ayaa weli taagan. Xildhibaanada mucaaradka ayaa ku adkeysanaya mooshinkii ay horey ugu gudbiyeen Guddoomiyaha Golaha, Sheekh Aadan Maxamed Nuur (Aadan Madoobe), iyagoo ku eedeynaya hoggaan xumo iyo maamul aan waafaqsanayn xeer hoosaadka baarlamaanka.
Mooshinkaasi wali laguma saarin ajandaha rasmiga ah, iyadoo laga war sugayo sida uu Guddoonka Golaha uga jawaabi doono, arrintaas oo lagu wadaa inay go’aamiso jihada uu u dhaqaaqi doono baarlamaanku maalmaha soo socda.
Warar hoose oo laga helay xubno baarlamaanka ka tirsan ayaa sheegaya in khilaafka wali uu yahay mid daran, inkastoo kulanka maanta loo arko fursad lagu dhimi karo xiisadda, ama ugu yaraan lagu bilaabi karo wadahadal cusub oo lagu soo afjaro is-marin-waaga siyaasadeed.
